Livres en VO

  • Ua maladiccion que pesa suus Baskervilles, vielha familha qui senhoreja dentz lo Devonshire, suu país ensauvatgit de la lana de Dartmoor. Un canhàs gigant, demòni gessit de l'Ihèrn, que pareish e lo senhor de Baskerville que se'n moreish d'eishante... La mòrt sobta e tragica de'N Charles Baskerville, los cridòris d'un canhàs qui s'audéishen capvath la lana, tot acò que dèisha créder la legenda que poiré estar vaduda realitat. Talèu arribat a Londras, vienent deu Canadà, En Henry Baskerville que receu ua letra anonima : « Se tiénetz a la vòsta vita e a la vòsta rason, hètz-ves enlà de la lana ». A maugrat d'aqueras miaças, En Henry decideish d'anar a Baskerville Hall. Consultat, lo detectiu Sherlock Holmes encarga lo fidèu doctor Watson d'i acompanhar lo joen baronet. L'enquista de Sherlock Holmes qu'a començat... Que serà longuèira, mauaisida e plea d'engoeish...
    Roman lo mei famós de'N Arthur Conan Doyle (1859-1930), jòia de la literatura policièira, The Hound of Baskervilles qu'es estat arrevirat directament de l'anglés entau gascon per Eric Chaplain, editor en lenga nòsta desempuish mei de trenta ans.

  • Tornam trobar lo comissari Casal que mena l'enquèsta dins tres afars novèls : Dins lo Castèl de la paur ont un òme morís de paur, lo comissari Casal s'i deurà prene a dos còps per comprene e resòlvre un mistèri mai qu'òrre. - La Crotz Baranhon nos torna dins lo grand Tolosa amb un afar que paréis simplàs d'una ataca a man armada dins una banca. Mas au brieu del temps, tot se desclicota e rès se passa pas coma se deuriá passar. Per astre, lo comissari a bona memòria e se daissa pas colhonar aital ! - La mòrt veniá del freg es un afar complicat sens cap de dobte : quin a podut far aquel gus, ambe las mans ligadas, per se penjar, dins aquel membre que dedins i a pas lo mendre mòble per s'anar penjar ?
    Dins un estile aisit, ambe una lenga a l'encòp simpla e saborosa, Raimond Guiraud nos torna dins l'univèrs de la Fabrica (lo comissariat central de Tolosa) que nos aviá fait descobrir ambe lo 22, carrièra del Taur.
    Nascut a Tolosa en 1929, lo "Guiraud de Basieja", montèt a París dins las annadas 50 onte trabalhèt dins l'agrò-alimentari mas doblidèt pas jamai la lenga mairala del País Mondin. Le sieu trabalh li faguèt costejar gendarmas, polícia e tribunals e mai tard, l'enveja li venguèt, aital, de se metre a l'escritura de romans policièrs. En occitan, plan segur, per l'amor del país e de la lenga nòstra.

empty